Read 1 إِكُورِينْثِييّنْ 4

1 إِكُورِينْثِييّنْ4rif_ati

رُّوسُولْ ن لْمَاسِيحْ

¹أجّْ أَنغْ خنِّي أَذْ نتّْوَاحْسبْ زَّايْومْ أَمْ إِمْسخَّارنْ ن لْمَاسِيحْ ؤُ أَمْ إِوْكِيڒنْ ن ڒسْرَارْ ن أَربِّي.²خنِّي إِتّْخصَّا إِ مْكُوڒْ أَوْكِيڒْ أَذْ إِتّْوَافْ ذ أَمْثِيقِّي.³نشّْ وَارْ ذ أَيِي إِشْقِي شَا مَاڒَا تّْوَاحكْمغْ زَّايْومْ نِيغْ زڭْ إِجّْ ن بْنَاذمْ نّغْنِي. ؤُڒَا ذ نشّْ وَارْ حكّْمغْ شَا خْ إِخفْ إِنُو.⁴مِينْزِي نشّْ وَارْ ؤُشِيغْ س شَا وَارْ إِحْڒِينْ ذَايِي، مَاشَا س مَانْ أَيَا وَارْ تّْوَاسڭّْذغْ، مَاغَارْ أَقَا سِيذِي ذ ڒْقَاضِي إِنُو.⁵س ؤُينِّي وَارْ حكّْممْ شَا خْ وَالُو قْبڒْ ڒْوقْثْ نِّي ذِي د غَا يَاسْ سِيذِي، ونِّي إِ غَا إِسُّوفّْغنْ غَارْ ثْفَاوْثْ مِينْ إِنُّوفَارنْ ذِي ثَادْجسْثْ، ونِّي إِ غَا إِسّضْهَارنْ إِخَارِّيصنْ ن وُوڒَاونْ. ؤُشَا ڒخْذنِّي كُوڒْ إِجّْ أَذْ غَارسْ يِيڒِي ؤُسمْغَارْ زِي أَربِّي.⁶أَقَا مَانْ أَيَا، أَ أَيْثْمَا، إِوْيغْ ث-إِ-د خَافِي ؤُ خْ أَپُولُّوسْ أَمْ يِيجّْ ن ؤُمذْيَا ذِي طّْوعْ نْومْ، حِيمَا أَذْ زَّايْنغْ ثْڒمْذمْ، مَاحنْذْ وَارْ ثتّْخَارِّيصمْ شَا بَارَّا إِ مِينْ إِدْجَانْ ذِي ثِيرَا، حِيمَا ؤُڒَا ذ إِجّْ أَذْ إِسّمْغَارْ إِخفْ نّسْ ضِيدّْ إِ ونِّي ذ أَسْ يُوذْسنْ ذِي سِّيبّثْ ن يِيجّنْ نّغْنِي.⁷مَانْ ونْ يَارزُّونْ ذَايكْ؟ نِيغْ مِينْ غَاركْ نِّي وَارْ ثطِّيفذْ؟ ؤُشَا مَاڒَا ثطّْفذْ ث، مَايمِّي ثْشنّْعذْ أَخْمِي وَارْ ث ثطِّيفذْ شَا؟⁸ڒخُّو أَقَا ثجِّيوْنمْ ؤُ ثْذوْڒمْ ثتّجَّارمْ، ؤُشَا بْڒَا نشِّينْ أَقَا ثْحكّْممْ أَمْ إِجدْجِيذنْ. معْلِيكْ كنِّيوْ ثْحكّْممْ أَمْ إِجدْجِيذنْ، أَذْ يِيڒِي نشِّينْ خنِّي أَذْ نحْكمْ عَاوذْ أَكِيذْومْ!⁹مِينْزِي إِتّْغِيڒْ أَيِي بلِّي أَربِّي إِڭَّا أَنغْ غَارْ ؤُنڭَّارْ، نشِّينْ إِنِّي إِدْجَانْ ذ رُّوسُولْ، أَخْمِي خَانغْ حكْمنْ س ڒْموْثْ، مِينْزِي أَقَا نذْوڒْ ذ أَفُورّجْ إِ دُّونشْثْ، إِ لْمَالَاكَاثْ ؤُ إِ إِوْذَانْ.¹⁰نشِّينْ ندْجْ ذ إِبُوهَاڒِييّنْ خْ سِّيبّثْ ن لْمَاسِيحْ، مَاشَا كنِّيوْ ثدْجَامْ ذ إِمِيغِيسنْ ذِي لْمَاسِيحْ. نشِّينْ نْهيّفْ، كنِّيوْ ثْجهْذمْ، كنِّيوْ ثتّْوَاشنّْعمْ، نشِّينْ نتّْوَاسّحْقَارَا.¹¹أَڒْ ڒخُّو نشِّينْ ذَايْنيْ ڒَاژْ ذ ؤُفَاذِي ذ ثُوعَارْينْثْ، شَّاثنْ أَنغْ، وَارْ غَارْنغْ بُو ثْزذِّيغْثْ،¹²نَاربّرْ أَمْ نْخدّمْ س إِفَاسّنْ نّغْ. نِيثْنِي سّحْقَارَانْ أَنغْ، أَقَا أَنغْ أَذْ نْبَاركْ، ذَارّْشنْ خَانغْ، مَاشَا أَقَا نْكسِّي أَرْمحْ،¹³شقّْفنْ ذَايْنغْ، أَقَا نتّْحشّمْ إِ-ثنْ ذِي ڒْخِيرْ. أَڒْ ڒخُّو نذْوڒْ أَمْ ثْزُوبَاتْشْ ن دُّونشْثْ، أَمْ إِفُورَاضْ ن مَارَّا، أَڒْ إِ ڒخُّو.¹⁴وَارْ تَّارِيغْ أَيَا حِيمَا أَذْ كنِّيوْ سّحْشِيمغْ، مَاشَا تّْزِييَّارغْ كنِّيوْ أَمْ ثَارْوَا إِعِيزّنْ.¹⁵وَاخَّا مَاڒَا ثُوغَا ذِينْ غَارْومْعشْرَا-أَڒَافْ ن يِينِّي إِ كنِّيوْ يَاربَّانْ ذِي لْمَاسِيحْ، أَقَا وَارْ غَارْومْ أَطَّاسْ ن إِبَابَاثنْ، مِينْزِي نشّْ جِّيغْ-د كنِّيوْ ذِي يَاسُوع لْمَاسِيحْ س لْ-إِنْجِيلْ.¹⁶س ؤُينِّي تَّارّغْ زَّايْومْ: أَروْسمْ أَيِي!¹⁷س ؤُينِّي سّكّغْ أَومْ-د ثِيمُوثِييُو، ونِّي إِدْجَانْ ذ مِّي إِعِيزّنْ ذ أَمْثِيقِّي ذِي سِيذِي، حِيمَا أَذْ ذ أَومْ إِسّْفكَّارْ إِبْرِيذنْ إِنُو إِ إِدْجَانْ ذِي لْمَاسِيحْ، أَمْ مَامّشْ ثنْ سّڒْمَاذغْ ذِي مَارَّا ثِيمسْمُونِينْ.¹⁸مَاشَا شَا زَّايْومْ أَقَا تّْنفَّاخنْ، أَخْمِي نشّْ وَارْ غَارْومْ تِّيوِيضِيغْ.¹⁹مَاشَا مَاڒَا إِخْسْ سِيذِي أَذْ غَارْومْ د-أَسغْ ذغْيَا. خنِّي وَارْ تّخْسغْ زعْمَا أَذْ سّْنغْ أَوَاڒنْ ن يِينِّي إِسّْڭعّْذنْ إِخفْ نْسنْ، مَاشَا جّهْذْ نْسنْ.²⁰مِينْزِي ثَاڭلْذِيثْ ن أَربِّي وَارْ ثدْجِي شَا ذڭْ وَاوَاڒْأنْ، مَاشَا ذِي جّهْذْ.²¹مِينْ ثخْسمْ؟ مَا أَذْ غَارْومْ د-أَسغْ س وعْمُوذْ نِيغْ س ثَايْرِي ؤُ س أَرُّوحْ ن ثمْهِينْثْ؟

1 إِكُورِينْثِييّنْ 4 / rif_ati

رُّوسُولْ ن لْمَاسِيحْ

1 إِكُورِينْثِييّنْ4rif_ati