1Bo'akala'u e, kau Idume Kabukabunai devonu kauta kataua kevatai aluva boina 'eva oi kevamuiai sia baluva vai, beia oi 'eva kanobata kanania kaumui boinai a'oumui, itani melo 'oma'omana Keliso laloanai boina.2Oi vaikabasi avenimui 'eva vitaitana bae boina kanaua'i avananimui beia sia bokama pasisitai, 'olana oi 'eva bokama kanaua ianinai asido'o oi okula'ila, vali'u vaka oi boania 'eva sia bedaia.3'Olana oi kaumui 'eva kanobata kauta eta mia ai oi omimia do'o, oi viloamuiai mama mai viala demimia, inoku koakoa katania'i oi 'eva kanobata enai oi o'ao, ena mia vitaitanai oi omimia.4Oi viloamuiai ka odiaka, “Lau 'eva Paulo mulinai adada'a,” ka oluluva odiaka “Lau 'eva Apolo mulinai adada'a.” Inoku oi 'eva kanobata kauta eta koakoa oi ovavai.5Inoku Apolo 'eva dai, mai Paulo vaka dai? Lai 'eva Dilava da'alana lai a'abi kaumai, lai emai vinaulai 'eva oi ota'u Dilava oi oabivenia, lai ka ka 'eva Lovia namana vinaula evenimai vinaulana mo lai avavaia.6Lau 'eva kea avadoia, Apolo 'eva veiai esisia, beia Dilava eta'u kea evakubua.7Inoku vadovado kauna mai sisisisi kauna 'eva sia ekaabitaisi, beia Dilava mo ekabia isi 'olana ia etata'u dava kataua evakubuta.8Vadovado kauna mai sisisisi kauna eta vinaula 'eva sia dedeana, Dilava betata'u ka ka eta vinaula vitaitanai tavata bevenita.9Lai laluana 'eva Dilava ena vinaula kaumai, oi 'eva Dilava ena loba maivaka ena luma.10Dilava ainama eveni'u vitaitanai lau 'eva luma ivalava kave'ina kaunai ao luma ivalavana abuna 'ani ava'olua, inoku kau vaida 'eva kanaua akanai luma dedaua, beia luma bedaua 'eva a bedaua koma lalovaina belalovaia kave'i makava.11'Olana Dilava 'ani Iesu Keliso evalavala luma kanaua idauna abunai eao, kanaua 'ounai kau ka luma edeana idauna abuna sia ka bevalavala.12Luma idauna abuna akanai 'eva kau vaida kolo, siliva 'o bika'a 'amale 'amaletai luma dedauia, beia vaida 'eva au ai 'o duvu ai 'o ako ai luma dedauia.13Beia kau ka ka eta vinaula koata 'eva lavuai melalana kanaua betata'u bevala'asita, melala kanaua 'eva mai 'alovana be'asi kau boutai eta vinaula beduita mai 'alovai bekovota kau ka ka eta vinaula nama'ita davata bevala'asi.14Luma idauna 'abuna kanaua akanai kau ka ka dava devavai davata 'alovai sia beani palu koanai ia eta vinaula 'eva tavata be'abi.15Beia kau ka ena vinaula kanaua 'alovai bevalo'olo'oa koanai ia 'eva betatabu, beia ia sibona 'eva bemauli vitaitana ia 'eva 'alova laloanai eveau asi.16Oi oikabasi oi 'eva Dilava ena lo'e kabukabuna maivaka Dilava Idumena 'eva oi nuamuiai emimia.17Kau ka Dilava ena lo'e kabukabuna bevasi'avanala koanai Dilava betata'u kau kanaua bevasi'avanala, 'olana Dilava ena lo'e kabukabuna 'eva ekabukabu inoku oi kaumui katana 'eva lo'e kabukabuna kanaua.18Sibomui sia olebamui. Viloamuiai kau ka elalovaia ia 'eva eidiba vaika kanobata kanania maulina laloanai koanai, ia 'eva sibona bo'o kaunai bevaoa, vakaia ia 'eva idiba kauna umaunai be'ao.19'Olana kanobata kanania aonekana 'eva Dilava vailanai bo'o aonekana. Puka kabukabunai kanania deleleia koma,“Dilava eta'u sibota delalovaiadeaoneka kauta eta aoneka evaviuta.”Iob 5.1320Mai vaka ediaka,“Lovia namana 'eva eikabasiaoneka kauta eta lalovai'eva anita asi'i.”Sal 94.1121Kanaua 'ounai kau ka sia eka apa vaia. Dava boutai 'eva oi emui.22Paulo 'o Apolo 'o Petelo, mai kanobata kanania 'o mauli 'o ba, mai vali'u depupulu davata 'o vailai bepupulu davata, boutai 'eva oi emui,23inoku oi 'eva Keliso nuanai oi omimia, Keliso 'eva Dilava nuanai emimia.