Read 1 KƆLINTƆ 16

1 KƆLINTƆ16yns_tsc

Ngim bàköŋà ntɔn Ikööŋ a Yɛlusàlɛm

¹Ntɔn ndaa a an'kab bàköŋà ntɔn aŋin'kyɛɛl, bɛ sye làläb nswɛɛŋ kàpɛ mɛ akà Ikööŋ a Ngalàtyà.²Kà ilä atàtwɛb kyà mpɔsà wanswà, wɛy mbuur mbuur usi ukɔl u ndwà ande undiir kàkwe nde muyee ntɔn mukɔɔn adil ngyeel amɛ mukɔŋ an'kab.³Utaaŋ in'yàkal mɛ akun, mɛ in'yàtɔm baar làyàsɔɔl bɛ anà in'kaan ntɔn musyen an'kab abɛ u Yɛlusàlɛm.⁴Isàkal naa yà ubwaŋ sye naa mɛ ŋakwo in'kyen, ba bàsàkyà anà mɛ.

An'kyän a Pɔl muyilyaaŋ

⁵Mɛ in'yàyà akà bɛ musoonà Masɛdwan, ntɔn mɛ in'yàlyaaŋ kwo.⁶Taaŋ lumwɛy mɛ in'yàkal ndam a ilä itàkal paŋà a mpyee lanswà apà bɛ, ntɔn bɛ lan'pɛ indiir byan'kwo mɛ mulab mbwo amɛ.⁷Mbalà ayi mɛ in'kwen anki, mukàlaman taaŋ alyaaŋ mɛ mpɛl, mɛ in'kwen mubwaay anà bɛ ndam a ilä, isàkal naa Mwol an'pà mbwo.⁸Wɛɛ mɛ in'yàbwaay u Ɛfɛsɔ tii kà un'kyɔm a Pantɛkɔt,⁹ntɔn mbwo a kölàköl yan'dubà ntɔn mɛ mukyer isal a ngwal, itàkal naa ayiiŋ bà mbɔɔn.¹⁰Isàkal naa Tumàtɛ kan'yà, làkyer naa nde ukäl anà duu uboo a bɛ, ntɔn nde afàkyer isal a Mwol asànaa mɛ.¹¹Abun, wɛy mbuur ukɔ̈ɔ̈n un'bɛy. Lun'pɛ byàŋàkwo ntɔn nde uyàfurà apà mɛ, ntɔn mɛ anà atɔŋ ibà mukun'dilà.¹²Ntɔn un'tɔŋ abi Apɔlɔs, mɛ kun'lɛɛl muyà akà bɛ anà atɔŋ bumwɛy, wɛɛ nde ukwen anki akà ikikye muyà apanà, nde asàyà mpal usàman nde mbwo.

Nswɛɛŋ anà mbɔr a ntsüü

¹³Làkäl kà igyɛɛŋ, làkäl aŋàtsim unsà làkwikilà, làkäl anà un'kanà, làkäl ngwal.¹⁴Làkyer indiir abɛ byanswà unsà ukwen.¹⁵Atɔŋ, nswɛɛŋ yumwɛy ayi: bɛ làkyàyöb naa Sɛràfan anà ywar ande bà baar atàtwɛb mubuul mpem kà Akayi. Ba bàpɛ mɔ̈ɔ̈ aba musyääl aŋin'kyɛɛl.¹⁶Lakyey, baar atub abà anà mbuur wanswà akääbà isal aba anà mpay aba.¹⁷Mɛ in'we anà un'sak muman Sɛràfan, Fɔrtünatüs anà Akayiküs. Ba bàfwe nkɔ̈ɔ̈n abɛ,¹⁸ntɔn ba bàlɛɛl mɛ anà bɛ. Làyöb mukan baar atub abà.¹⁹Ikööŋ a Azi byàmàlapà mbɔr. Akilas anà Priskà, anà Ikööŋ ifàköŋ u ndwà aba bàmàlatöm mbɔr mbɔɔn unsà Mwol.²⁰Atɔŋ banswà bàmàlapà mbɔr. Làpɛɛl mbɔr bɛ a bɛ unsà ndüür a in'kyɛɛl.²¹Mbɔr ayi yà kɔɔ amɛ ŋakwo, mɛ Pɔl.²²Isàkal naa mbuur ukwen anki Mwol, wɛy nde ukäl aŋàküül! Mwol abi, yà!²³Wɛy kab a ngway a Mwol Yɛsu làkäl anà bɛ.²⁴Mɛ bɛ banswà in'kyàlakwen amu Yɛsu Klistɔ.

1 KƆLINTƆ 16 / yns_tsc

Ngim bàköŋà ntɔn Ikööŋ a Yɛlusàlɛm

An'kyän a Pɔl muyilyaaŋ

Nswɛɛŋ anà mbɔr a ntsüü

1 KƆLINTƆ16yns_tsc