1Ɓaah ciŋ ngo, mi yii naandis ɗu Yegɗohiŋ Muci ŋ woyee ɗu, yegɗohi ɗu rahas te po woti ɗu ris amb nga ndengiɗ.2E yegɗoheem na mucɗee ɗu ne ɗu amba baahiɗ findi ŋ yegɗoh ɗu wa ɗah ; ɗu tumohɗi wa findi ŋ woyoha ɗah, kosiŋ ɗu ɓarang ɓarang.3Ini ŋ koc ɗu eɗ, weɗ jangɗohi ŋ rahas mi ŋ haf fo, weɗ ne : Kiristaani kaaniɗ wuu bakaaɗ ciŋ ɓoo, findi Fiis ci Hooliɗ ci woyoha.4A ɓekuusa ŋ ruy-ruy te ŋ mbeha kaahayɗoh a hultiɗuusa findi Fiis ci Hooliɗ ci woyoha.5A teeɓkiɗ ɓi ɓo' laayiɗ jahran, a teeɓuk Piyeer, ƴutta a teeɓukka Apootar ci ndaŋkiyaah na kanak ci (12).6Ƴutta, a teeɓukka waas yino ini uup ɓo' teemet-yatuus (500) ŋ ɓaah ciŋ ɓoo kosiɗ ci. Raakiɗ ɓi kaan, waaye laayiɗ nga ɓa ɓii pes.7Ƴutta, a teeɓukka Saak, ƴutta a teeɓukka Apootar ci jen.8Wi a teeɓuk ɓa jen, a nammba so teeɓuk ŋ mirndaani, mi yi mand na liir mitaaɗi.9Ee, ñam uup ƴissuut ŋ Apootar ci. Ŋ yeyyooɗi sah ɓeeɗku Apootar, laam ŋ tolfiɗiɗ Janguuniŋ Kooh.10Waaye, ngaŋ baahohiŋ Kooh, ŋ nikiɗ ɓoyi ŋ nik, te baahohi a baahoh ho nikɗi ɓarang ɓarang. Te sah ñam panguk pangki uup wiŋ Apootar ci ɓinooɓi jen. Wa keeh ne ñam panguk haa, e baahohiŋ Kooh wi nik nga so, weɗ panguk.11Kon, wa nik mi, wala wa nik ɓa, ineem weɗ Yegɗohiŋ Muci ɓoo na yegɗohe te ineem weɗ ɗu kose.
Kooh hey hultiɗe kaaniɗ ci
12Kon ɓoo jen, ɓoo na yegɗohe ne Kiristaani hultiɗuuɗ, waaye raakiɗ ɓi na woye nga ɗu ne hulit raakɗi. Ɓa minoh woo ineem na ?13Nik ne hulit raakɗi ɗah, kon Kiristaani namɗi hulit.14Te nik ne Kiristaani hultiɗuuɗi ɗah, kon yegɗohiŋ ɓoo raakɗi njiriñ, te kosiŋ ɗu ɓarang ɓarang.15Ɓaatta nga nik ne kaaniɗ ci hultanɗi ɗah, kon ɓoo ɗaliɗ Kooh ŋ seedeeni ɓoo na seeɗe'ɗee ɗe ne a hultiɗiɗ Kiristaani te a tumɗaa.16Nik ne kaaniɗ na hulteeɗi ɗah, Kiristaani namɗi hulit.17Te nik ne Kiristaani hultiɗuuɗi ɗah, kon kosiŋ ɗu ɓarang ɓarang, te ɗu ris na bakaaɗ ciŋ ɗu.18Ŋ ineem ɓi kaan ŋ kosi ɓa kos Kiristaani, ɓa sooƴiɗ.19Nik ne ɓoo ooluk Kiristaani ŋ kipes kii dong ɗah, kon e ɓoo uup miskoh ŋ ɓooɓi jen !20Waaye wa keeh, Kiristaani hultiɗuuɗ, a yi koc hulit ŋ kaaniɗ ci, findi tohri koc ruund.21Laam findi kakaan taamboh ŋ ɓo' yino aassa Adina, hulti nam taamboh ɗaa ŋ ɓo' yino, hayya.22Te findi ɓooɓi jen na kaanohe, sagu ɓaahi ɓa ɓaah ŋ Aadama, ɓa jen, ɓa hey rahsisse kipes sagu ɓaahi ɓa ɓaah ŋ Kiristaani.23Waaye yaa nu nga na mbariŋ ɗe. Kiristaani a yi koc hulit ; a hay ɗah, ɓi ɓaah nga ɗe hey name hulit.24Ƴut ɗah, reehiŋ Adina han hay : Kiristaani hey reehɗe kikilifa nu nik na nguur nu nik na hatil nu nik. Ƴut ɗah a hey wike Kooh Baabi Nguuri.25Laam Kiristaani joyiɗ nik buur po mbaɗna Kooh folan sangiɗ ciŋ ɗe jen, a tum ɓa degoha kot ciŋ ɗe.26Kakaan, weɗ sangiɗi mirndohan sooƴɗu.27Fiis ci woyiɗ ne : « Kooh degiɗ in ci jen ŋ yaah ƴaareem », waaye Fiis ci woo "in ci jen" ɗah, wa hooliɗ ne a in ci jen ɗal Kooh yi deg in ci jen ŋ yaah ce.28Kaɗ po in ci jen degu ŋ yaah Kiristaani ɗah, a yi Kuɓki, a hey wike haf ce ŋ Kooh yi deg in ci jen ŋ yaah ce. Jaar Kooh nik in ci jen, ŋ ɓooɓi jen.29Raakiɗ ɓooɓi na ɓoktuke sagu kaaniɗ ci. Nik ne kaaniɗ ci hultiɗassanɗi muk ɗah, wa raakiɗ ɓa wi nde njiriñ ? Te nik ne wa keeh ne kaaniɗ ci hultiɗassanɗi ɗah, wa ye tah ɓooɓi ɓoktukee sagu kaaniɗ ceem ?30Te nik ne wa ɗaa ɗah, wa ye tah ɓoo toonee kiñin ciŋ ɓoo wahtu nu nik ?31Ɓaah ciŋ ngo, wa keeh ne Kooh-nu-wiis maa hote ŋ kakaan an, findi wa nam nikoh keeh ne maa ndamkohee ɗu. Ŋ fiki ɓooɓi, maa ndamkohee ɗu ŋ Kiristaani Yeesu, Heɗ ɓoo.32Nik ne hiñohi ŋ hiñoh ŋ Efes na ɗoopaat-nduuf ci, e taambiɗ kiñin kiŋ ngo tah ho tuma ɗah, wa raakiɗ to wi nde njiriñ ? Kon nik ne kaaniɗ ci hultanɗi ɗah, wooree ɓa nga : « Ɓoo ñamaat, ane, laam kim wa kaan. »33Kinaat ñaañoh haf ɗu ! Wooree ɓa nga : « Huntoh baahaaɗi na yahrohe yahroh jiko. »34Dokkaat ŋ haf ɗu moɗoɗ, te ɗu faɗ bakaaɗ ; raakiɗ ɓi inahɗi Kooh nga ɗu. Mi yii woya, wa joy nik kaci nga ɗu.
Findi faan ci mandan ŋ hulta
35Waaye ɓo' miniɗ meeksoh ne : « Kaaniɗ ci hultohan na ? Ɓa hayan na cinde faan ? »36Ɓoyeem ñaañɗi ! Fu sok tisoh ɗah, wa joyiɗ kaan bala wa camban pes ɗah.37Te fu sokee ɗah fu na sokeeɗi kidgi na faaniŋ wa, fu na soke tisoh ɓarang, wa miniɗ nik tisoh bele wala tisoh wiiriis.38Ƴut ɗah, Kooh eɗ tisoheem faani a waaɗ, a na eɗe tisoh nu nik faaniŋ wa haf wa.39Faan ciŋ feruuɗ ci jen ceɗ ɗaloh : faan ciŋ ɓo' ci, na faan ciŋ ɗoopaat ci, na faan ciŋ sel ci na ciŋ cuurund ci.40Wa raakiɗ in ci ɓo' min hot ŋ kehƴi, wa namiɗ raak in ci ɓo' min hot ŋ ɗafki ; waaye moɗ kiŋ in ciŋ ɗafki mandɗi na moɗ kiŋ in ciŋ kehƴi.41Nohi raak siñaariŋ wa haf wa, wa mand ɗaa ŋ caɓni na hor ci ; wuu hor sah ɗalohiɗ na waa hor morom wa.42Wa mandan ɗaa ŋ hultiŋ kaaniɗ ci. Faan uumbsee findi tisoh ŋ kehƴi ɗah, wa na kee yahka ; wa hulit ɗah, wa yahkissanɗi.43Faan uumbsee ŋ kehƴi ɗah, wa na moɗeeɗi, waaye wa hulit ɗah, wa na hulte na moɗ keeh-keeh. Faan uumbsee ŋ kehƴi ɗah, wa na raakeeɗi hatil, waaye wa hulit ɗah, wa na hulte riifiɗ na hatil.44Faan uumbsee ŋ kehƴi ɗah, wa na nike faan njaay rek, wa hulit ɗah, wa nik faani Fuuɗsiŋ Kooh na pesɗe. Faan njaay raakiɗ ɗah, kon faani Fuuɗsiŋ Kooh na pesɗe namiɗ raak.45Ŋ ineem wa fiisuuɗ an : « Aadama, ɓoyi koc, nikka pesoh. » Waaye Aadamaani mirndoh nak, a nikka riifiɗ na Fuuɗsi Hoolohngaani, a onohee kipes.46A faani riif na Fuuɗsi Hoolohngaani, weɗ koc hay haa, waaye faani njaayi, weɗ koc hay, wi riif na Fuuɗsi hannda hay.47Aadamaani koc, kooɗohu kehƴi, a mahohu mun merhey. Aadamaani kanakɗoh puloh Eel ci.48Ɓi kehƴi, ɓa mand na yi kooɗohu kehƴi, ɓi ɓaah ŋ Eel ci, ɓa mand na Yi puloh Eel ci.49Te findi ɓoo mandoh na yi mahohu mun merhey, ɓoo mandohan ɗaa na Yi puloh Eel ci.50Ɓaah ciŋ ngo, ini ŋ waaɗ woo weɗ ne faan ciŋ ɓoo cii minɗi raak waɗ ŋ Nguuriŋ-Kooh, te ini min yahuk minɗi raak waɗ ŋ ini yahkanɗi.51Ŋ hey ɗu woye in ɗasɗukiɗ wi ɗu inahɗi : Ɓoo kaananɗi jen ; waaye ɓoo jen hey ɓoƴsasse.52Wa nikan ŋ harmban ñep na marak, kulɓi mirndoh kuluɓ ɗah. Laam wa hey kulɓe. Ŋ ndeem, kaaniɗ ci hey hulte ne ɓa ɓay faan ci minɗi yahuk ; ini kaɗ nga ɓoo, ɓoo hey ɓoƴsasse.53Laam faani kaɗ ŋ yahuk joyiɗ ɓekuk faani minaaɗi yahuk, te faani kaɗ ŋ kaan ɓekuk faani kaananɗi.54Faani na kaɗe ŋ yahuk ɓekuk faan minaaɗi yahuk te faani na kaɗe ŋ kaan ɓekuk faan minaaɗi kaan ɗah, ŋ ndeem, ini Fiis ci woo wii raak :« Kakaan ki saahuuɗ jameet,Wa sooƴiɗ. »55« Moo kakaan, wa nde ndamiŋ ɗa ?Kakaan, wa nde maangohaaniŋ ɗa ? »56Bakaaɗ, weɗ maangohaaniŋ kakaan ; te a waas na eɗe bakaaɗ hatiliŋ wa.57Waaye ɓoo corkiɗaat Kooh yi on ɓoo ndam taamboh ŋ Yeesu Kiristaa Heɗ ɓoo.58Weɗ tah ɓaah ciŋ ngo ŋ keeñkoh, ndengaat tir, ali in kanaat ɗu yoondiɗ, genaat ɓaat ndengɗuk ŋ pangkiŋ Heɗi te inhaat ne pangki miskiɗi ɗu na pangke ŋ niki ɗu nik ŋ Heɗi nikɗi ɓarang ɓarang.