Kuhyuka kwa Kilisito
1Hinu maalongo bhangu, nungupala nuakulungwe Nhalo ghwa Maha ghunualandamihite kwa mwenga, na mwenga mukikingama, ayiyinguatenda nnyime ngingilima mu kuhyubhalila.2Kwa njila ayi mungulopolehwa, payibhegha maaghungila maha Lilagho linualandamihite mwenga. Hela bhubho kuhyubhalila kwenu kubhegha yaghi hela.3Mana nenga nikaahunda mwenga milando yiniyikingamite, Kukita Kilisito kikihwegha kubhukana na ulemwa ghwetu, handa paghatyekitwe Malembo gha Chapanga,4kangi kakikulilwa na kakihyuka linjubha lya ndatu kulandana na malembo gha Chapanga,5na kakinbwitukila Petili, na mbole kakiabwitukila bhala andumila mbinda mabhoko kumi na abhili.6Mbole yaki kakiabwitukila kwa papamu bhala ahyubhalila kuchweha kwa mia nhano, atangalo bhabhe akali bhangulama na amoo bhangi ahwegha kala.7Mbole yake kakinbwitukila Yakobo na kangi kakiabhwitukila andumila bhoha.8Mbole ya bhoha, kakibwitukila nenga bhubho, nenga nikibhegha handa mwana ywakabhelekitwe yikali na nndaluko ghwake.9Mana nenga ndo mdokwa mu nkati ya andumila bhoha, na nungunoghwa kata kukemwa nndumila, kiyaha nikiapamanda ngwemuko lya bhandu bha Chapanga.10Peni kwa umaha ghwa Chapanga, megha handa mumeghite, na umaha ghwake kwa nenga ghukibhegha chepa ghwa yaghi hela. Ngati nikitenda lihengo kuchweha kwa andumila bhoha, peni yikibhegha chepa kwakya umaha ghwangu, ngati ndo umaha ghwa Chapanga ghuutenda lihengo papamu na nenga.11Habhu, meghe nenga, ebu bhala andumila bhangi, bhoha tungulandamiha nhalo ghulaghula ghumuuhyubhalila.Kuhyuka kwa twenga.
12Hinu, handa tulandamiha kukita Kilisito kahyuka kuhuma mu kiho, kya bhuli, amoo bhenu mungulongela kukita kahone kuhyuka?13Peni handa kahone kuhyuka, hino, na Kilisito bhubho kakihyuka ng'obhe,14na handa Kilisito kakihyuka ng'obhe, hino, malandamiho ghetu ghubhegha gha yaghi, na kuhyubhalila kwa twenga kubhegha kwa yaghi hela.15Kuchweha kwa agho, twenga tungubhonekana kukita ahwangi ya kya nhalo ghwa Chapanga, kiyaha tukilongela kukita Chapanga kakinhyuha Kilisito, penni handa kilisito kakihyuka ng'obhe, ndo hoto kukita bhaahweghite bhaahyuhwa ng'obhe.16Mana handa bhaahweghite bhanguhyuka ng'obhe, hino naywo Kilisito kakihyuka ng'obhe.17Kangi handa Kilisito kakihyuka ng'obhe, hino kuhyubhalilo kwa mwenga kubhegha kwa yaghi hela, na nkali mungutama mu ulemwa.18Ubhwabhu abhu, bhala bhoha bhaahweghite mu kunhyubhalila Kilisito abha bhoha ahobha yomo.19Handa udumbilo ghwetu mu Kilisito ndo kungulinga ubhumi aghu ghweka, hino twenga tungunoghwa kubhonelwa luhungu muno kafauti na bhandu bhangi bhoha bha munnima.20Peni uhoto ndo kukita, Kilisito kakihyuka, na ndo ywa kalongohi kwa bhala bhaaghonjite mu kiho.21Handa bhula kiho kikiyeghwa kupitila mundu yumu, ubhwabhu abhu kuhyuka kuyeghwa kupitila mundu yumu.22Handa bhula bhandu bhoha paahwegha kwa kubhukana na Adamu, hilahila bhandu bhoha bhatahyuka kwa kulilunga na Kilisito.23Peni kila mundu kaahyuka mu npangilo ghwa njila ayi, Kilisito huti, mbole bhala bhaabheghite bha Kilisito mulinjubha lyakapala kuhika.24Mbole ya agho, uhiko ghwaahika, linjubha Kilisito pakankamuha Chapanga Tate Ubhutwa, mbole ya kutakulila kutali kila modeli ya ulongohi, na utabhala, na makakala.25Mana Kilisito kangunoghwa kabhahotole amyanja bhake na kuatabhala.26Nmyanja ywa kuuhiko ywakapala kukanjaghanwa ndo kiho.27Kiyaha, Malembo ghangulongela, “Chapanga kahibhika hilibhi hyoha pahi yaywombe” Peni Malembo paghalongela, “Hilibhi hyoha hibhikwa pahi ya ywombe kahitabhale” ndo kulyaghila kukita Chapanga kabhegha ng'obhe pahi ya Kilisito, mana Chapanga ndo ywakahibhikite hilibhi ahyo pahi ya Kilisito.28Peni apo hilibhi hyoha pahibhikwa muutabhala ghwa Kilisito, ndo Mwana pakalitamiha pahi ya Chapanga, ywakahibhikite hyoha pahi ya utabhala ghwa Chapanga, ngati Chapanga katabhale hilibhi hyoha.29Hino, handa kahone kuhyuka, bhaatenda bhuli bhala bhanakubatiswa kwakya bhaahweghite? Handa bhaahweghite bhanguhyuka ng'obhe, ya niki bhandu bhangubatiswa kwakya bhombe?30Na twenga, ya niki tunguliyambuha kulikoma kila lisaa?31Maalongo bhangu, kila linjubha nenga nunguliyambuha mu kiho, nunguliloka kwakya mwenga mu kulilunga na Kilisito Yesu Bambo ghwetu, na yingundenda nandamihe nnando aghu.32Handa ningo yangu yingabheghite ya kianamundu ghweka, kula kututana kwa nenga na bhadu bha ku Efeso bhaabheghite handa anyama akalipa, kungandangatilite kilibhi ghani? Handa bhaahweghite bhanguhyuka ng'obhe “Hino, twenga tulyeghe na kunywegha, kiyaha kilabho twaahwegha.”33Nkotoke kukuluhwa na bhandu bhaalongela habhu. “Mana kulihanga na bhandu ahakata kungutindingana malema gha maha.”34Mbangatuke, mmeghe na mahala handa muyinoghwa, nneke kutenda kangi ulemwa, kiyaha amoo bha bhandu bhangi bhangummanya ng'obhe Chapanga. Nungulongela milando ayi ngati mmone honi.Mmili ghwa kuhyuka
35Mundu kaahotola kukonya, “Bhaahweghite bhaahyuka bhuli? Bhaabhegha na mmili ghwa libhumbo ghani?”36Mwenga maabhugha bhugha! Paghukweta mbeyu handa kyanga kuhwegha huti, hyamela ng'obhe.37Kighukikweta ndo mbeyu ghweka, pangi hya ngano, ebu hya mbunje hingi, na chepa mmela nhilimila ghuukula mbole yake.38Peni Chapanga kanguyipegha ahyo mbeyu libhumbo lya kighweka handa pakalingite mwene, na kila kafauti kafauti ya mbeyu kanguyipegha libhumbo lyake.39Ubhwabhu abhu mibhili ya hibhumbe hyoha hingulingana ng'obhe. Mibhili ya anamundu yibhegha ya kighweka, ya anyama yibhegha ya kighweka, na mibhili ya hiyuni yibhegha kighungighungi na ahomba bhubho abhegha kighungighungi.40Kangi yibhegha mibhili ya kunane kwa Chapanga na mibhili ya apa pannima, peni umaha ghwa mibhili ya kunane kwa Chapanga yingulihwana ng'obhe na umaha ghwa mibhili ya apa pannima.41Luchubha lubhegha na umaha ghumu, na Lubhalamwehi nalwo lubhegha na umaha ghwake, na hata ndondwa bhubho, nahyo ndondwa hingukafautiana kwa umaha.42Habhu ndo payipala kubhegha munndaluko ghwa uhyuko ghwa bhaahweghite. Handa bhula mbeyu, mmili ghungukulilwa pahi mulindogholo paghubhegha mukubhola, na paghupala kuhyuhwa ghungubhegha ghwangabhola.43Mmili ghungukulilwa kwa mmonekano ghwa bhwaghalili, ngati ghunguhyuka mu mmonekano ghwa uhokomo, mmili paghukulilwa mu uyoyobhalo, ngati ghunguhyuka paghubhegha nyanyi na nglii.44Mmili paghukulilwa ghungubhegha ghwa bhwakabhwaka, ngati paghuhyuka ghubhegha mmili ghwa kinhuki. Handa ghungubhegha mmili ghwa bhwakabhwaka, hino, kwaabhegha na mmili ghwa nhuki45Kiyaha Malembo ghangulongela, “Mundu ghwa kalongohi ndo Adamu, kakitendekwa kibhumbe yuna ubhumi” Peni Adamu ghwa uhiko ndo Nhuki yunakuapegha bhandu ubhumi.46Peni ghuulongola kubhegha chepa ghula mmili ghwa kinhuki, ngati ghula mmili ghwa bhwakabhwaka, mbole ghula mmili ghwa nhuki.47Adamu ghwa kalongohi kakibhumbwa kwa lutupi, kakihuma mulutupi, mundu ywa ubhili kakihuma kukane kwa Chapanga.48Bhandu bhoha bha munnima abhegha na mibhili handa Adamu ywakabhumbitwe kwa lutupi, peni bhala bhaabheghite bha kunane, abhegha handa yula ywakahumite kunane kwa Chapanga.49Handa bhula patulihwanite na yula ywakabhumbitwe kwa lutupi, ubhwabhu abhu twalihwana na aywo ywakahumite kunane kwa Chapanga mana yake ndo Kilisito.50Maalongo bhangu, nungulongela habhu, hila hitenditwe kwa mmili na mwahi, hyahotola ng'obhe kulilunga mu ubhutwa ghwa Chapanga, na hinakupyokoka hyahotola ng'obhe kubhuya kubhegha hyangali kupyokoka.51Nnyihwe, nunguaghombela lupwepo, twenga twahwegha ng'obhe twabhoha, peni twabhoha twaghalambuhwa.52Paghukupila meho litalumbeta lya uhiko palupyembwa, kiyaha litalumbeta lwapyembwa nabho bhaahweghite bhaahyuka na mibhili yangapyokoka, na twenga twaaghalambuhwa.53Kiyaha mbaka kila kilibhi kinakupyokoka kighalambuke kibheghe kyangapyokoka, na mmili aghu ghunakuhwegha ghwaghalambuke ghubheghe mmili ghwangahwegha.54Hinu, mmili aghu ghuupyokoka paghughalambuka kubhegha ghwangapyokoka, na kila kinakuhwegha pakighalambuka kubhegha kyangahwegha, apo ndo palitwihilika lila Lilagho lityekitwe, “Kiho kilepelwa, uhotolo ghutwihilika.”55“Kiho, uhotolo ghwako kubhegha kwoki?Makalala ghako gha kuyegha lusungu ghabhegha kwoki?”56Ulemwa ghunguyegha lusungu lwa kiho, makakala gha ulemwa ghangubhonekana kukindila Malaghilo gha Musa.57Peni tunnumbe Chapanga, ywakatupegha uhotolo kukindila Bambo ghwetu Yesu Kilisito.58Kya habhu maalongo bhangu, nnyime nglii mu kuhyubhalila. Ng'endelele maha manjubha ghoha, pankakalika kutenda lihengo lya Bambo, pammanya kukita lihengo lyenu chepa lya yaghi mukutenda lihengo lya Bambo.