I CORINHTO14hre_bth

Capoch pajàu sam bàu halac

1Drah ti tiaq chaq kan loq waq. Hadai drah tangèh ka ƀài kan tabàih enh Yiang, ta aih màiq capoch pajàu aih joq yeo nhet.2Majah qmang aih cabô capoch bàu halac, aih ùh xài haq capoch ka kon mangai mahaq haq capoch ka Boc Plình, ma joq qnàng aih ùh i cabô qnì tàng (majah qmang aih enh dalam ka Yiang mangai aih capoch bàu hlèp);3da mangai capoch pajàu aih haq capoch ka kon mangai đòeq broq wì jah ka cajap, hu pariaq rai ti alòng.4Mangai capoch bàu halac, aih haq broq ka cla rađeh jah cajap, yàng da mangai capoch pajàu aih haq paqnhrang Tagop Hadròeh.5Au ngèh ka oh daq dìq capoch bàu halac, mahaq au ma yeo ngèh aih oh daq capoch pajàu. Mangai capoch pajàu aih yeo kàn ka mangai capoch bàu halac mahaq ùh i ka cabô anoe hlài dôq Tagop Hadròeh jah loq tàng đòeq hu jah qnhrang.6Manòeq kô, dìq ka oh daq, tàng joq au trùh ti oh daq, au capoch ƀài bàu halac, mahaq bàu aih ùh i paqnoh am ka oh daq loq kan hlèp, ùh i kan rabiaq, ùh i bàu pajàu, ùh i hnài oh daq loq qmòe cleq, aih ajah cleq ka oh daq?7Yac ka ranac croh pi i kan rìh mahaq loh atêh qmang ka taliaq, qmang ka broc, tàng ùh i bàu ma crài ka dabau đòeq hu hadro aih broq qmang leq ma canau ka taliaq hlui cleq, broc rawêh cleq?8Tàng ken hlui ma nhài aih èh cabô ma hu padon lam tajêh?9Oh daq hanoh qmang aih, tàng joq ùh yŏc rapet tapoch ma hloh dôq wì tàng, broq qmang leq wì maloq oh daq anoe cleq? Aih oh daq capoch ka cayeo.10Oe crŏng taneh i bàc bàu capoch, ùh i bàu leq ma ùh i ka ranenh.11Qmang aih, tàng au ùh qnì tàng qmòe ranenh bàu mangai ma qnang anoe, ajoq mangai aih ngan au budàng mangai diac wì, au hanoh hnoq haq qmang ka mangai diac wì diq.12Qmang aih oh daq drah ngèh drah ti chaq ƀài kan tabàih da Yiang Hadròeh. Chaq ma yeo bàc đòeq hu paqnhrang Tagop Hadròeh.13Dài aih, mangai capoch bàu halac, drah waiq khàn đòeq hu jah anoe hlài dôq wì loq bàu aih.14Majah qmang aih, tàng au waiq khàn xi bàu halac, aih yiang da au waiq khàn mahaq gàu ngoc au ùh qnì cleq.15Aih èh au broq qmang leq? Au waiq khàn tiaq yiang, mahaq au hanoh waiq khàn tiaq gàu ngoc. Au calêu tiaq yiang, mahaq hadai calêu tiaq gàu ngoc.16Ùh qmang aih, tàng ìh toq manè apôi tiaq yiang, èh mangai ma ùh qnì haq haqngui tamàng, ùh qnì ìh capoch cleq, broq qmang leq haq maloq tiaq bàu manè aih đòeq hu doe “Amen”?17Hi loq ka bàu manè apôi da ìh aih joq lem, mahaq mangai qnoeq ùh jah canòm ka bàu aih đòeq hujah qnhrang đeh diq.18Au manè apôi Boc Plình, au khoe jah capoch bàu halac yeo bàc dŏng ka pì oh daq,19mahaq oe ta hnim Tagop Hadròeh, au enh yŏc padam nà bàu ma loq tàng đòeq hu jah hnài mangai qnoeq aih yeo hnau ka yŏc mòeq mùan bàu halac.20Pì oh daq pi dùh hèm tìah ka manoh kon qyoh hòm. mahaq trong dù aih ma khòh tìah ka kon qyoh. Trong rabiaq loq drah tìah ka mangai khoe gêh mangai.21Ta hset ranenh i achìh: Chuaq doe“Au canòm ka mangai capoch bàu halac xam hacùng bàu mangai diac wì,đòeq hu tapoch ka ƀài mangai kô;Mahaq qmang aih dua wì ùh tamàng au”.22Qmang aih, ƀài bàu capoch aih teo, ùh xài ka mangai lùi mahaq đòeq ka mangai ma ùh lùi Chuaq. Yàng da bàu pajàu aih teo, ùh xài ka mangai ùh lùi, mahaq đòeq ka mangai lùi Chuaq.23
Qmang aih jò Tagop Hadròeh tagop ti dabau, tàng rìm mangai tapoch đeh hra bàu halac, yàng i mangai ùh qnì đeh cleq, èh i mangai ùh lùi Chuaq mùt diq, aih wì ma ùh hìaq doe ka pì ranhùa qmòh?24
Mahaq tàng i mangai ùh lùi Chuaq i mangai ùh qnì cleq mùt, wì tàng rìm ngai pì qnang tapoch bàu pajàu, bàu aih tabroq ta manoh, bàu aih hadrah ka wì haq,25
ƀòe kan hlèp ta manoh wì haq khoe jah paqnoh loh, aih èh wì ma ùh bla-op dèh hadrò ta taneh đòeq kùh waiq Boc Plình, rai doe: Joq qnàng i Boc Plình oe taqne oh daq!

Jò kùh waiq

26Atìq ka aih bèn anoe qmang leq hòm oh daq? Jò oh daq tagop ti dabau, enh dalam pì, tàng mangai leq i ƀai calêu hadròeh, i bàu hnài, i kan mahnu, tàng i mangai tapoch bàu halac, tàng loq i mangai anoe hlài bàu aih. Rìm yiniq aih ep broq ma gêh dŏng đòeq rìm ngai dìq jah paqnhrang.27Tàng loq i mangai tapoch bàu halac, aih baiq piq ngai tapoch raq hêq, mahaq ep tagòm dabau, ep waq ka i mangai anoe hlài.28Tàng ùh i ka mangai anoe hlài, mangai aih ep oe hatinh ta hnim Tagop, cla tapoch deh ka cla xam ka Boc Plình.29Mangai capoch bàu pajàu hadai palap baiq piq ngai raq hêq, mangai qnoeq hèm rai boq ka bàu aih.30Mahaq tàng i mangai leq qnang hangui ta aih hnoq kan mahnu, aih èh mangai ma adroe ep hatinh.31Majah qmang aih dìq ka oh daq khoe ka maleq trùh maleq dìq jah capoch bàu pajàu, đòeq rìm ngai jah hŏc jah alòng.32Yiang da pajàu iu tiaq mangai pajàu.33Majah qmang aih Boc Plình aih ùh xài Boc Plình da kan manhài, mahaq Boc Plình da kan catèm. Drah broq tìah dìq ka ƀài Tagop Hadròeh da mangai hadròeh,34gucadrì ep oe ma hatinh ta hnim tagop, wì haq ùh jah capoch ta aih, mahaq ep iu tiaq qmang ka bàu hset ranenh hnài.35Tàng wì haq loq i yiniq enh bòch waq ka loq, wì haq ep bòch dèh ŏng jò wì oe ta hnim, majah qmang aih gucadrì capoch ta hnim tagop aih raq kan camaih.36Ahìaq bàu Boc Plình loh enh oh daq, tàng ùh meh haq trùh toq ta oh daq raq ùh xài?37Tàng loq i cabô hèm đeh kô pajàu, đeh kô jah kan loq enh Yiang Hadròeh sreo am, mangai aih khòh loq rameh: Rìm yiniq au achìh ka pì kô dìq bàu Boc Plình thê.38Tàng mangai leq ùh enh tamàng aih mac da wì haq!39Qmang aih, oh daq drah ngèh chaq màiq capoch bàu pajàu, èh hadai apaq tàt trong capoch bàu halac.40Mahaq rìm yiniq ep broq troq dèh bè rai waq ka i atìq adroe.
expand_more
Search