Obwîrhonzi n’olwiganyo lw’Israheli
1Bulya, yâgi bene wîrhu, ntalonza muhabe: balarha boshi bakâg’ilangûlwa enjira n’ecitù, boshi bayikiraga enyanja,2boshi bacêsibwa muli Mûsa omu citù n’omu nyanja,3boshi balya kalyo kaguma k’enyanya,4bànanywa boshi cinyôbwa ciguma c’enyanya. Bakâg’inywa oku mîshi g’omu ibuye ly’enyanya lyàli libalusize; n’eryôla ibuye lwàli lwîganyo lwa Kristu.5Cikwône banji muli bo barhasimîsagya Nnâmahanga; kwarhuma emibiri yâbo yalambama omu mpinga.6Ebyôla byàbîre mpu lyo rhubonerakwo olwiganyo, mpu lyo rhulek’ibà n’enyifinjo mbî akâbo.7Murhagashanizagya enshushano z’abazimu aka baguma muli bo, kulya biyandisirwe, mpu: «Olubaga lwatamala mpu balye bananywe, okuhandi banaciyimuka mpu basâme».8Rhumanye rhwankajira eby’enshonyi aka baguma muli bo; bahungumukamwo bihumbi makumi abiri na bisharhu omu lusiku luguma.9Rhurharhangulaga Nyakasane aka baguma muli bo; enjoka zabaherêrekeza.10Murhacîdudumaga aka baguma muli bazigululwa na Kaheza.11Ebyo byoshi byabayishîre mpu bibè lwîganyo, byanayandisirwe mpu rhubonereho, rhwe rhwahika omu nsiku nzinda.12Ntyo, ocîkebirwe mpu ayîmanzire, amanye ankahirima.13Ntà mango musâg’igwârhwa n’amashumi galushire emisî y’omuntu. Akanwa ka Nyamuzinda karhagaluka; arhankaziga mwashumikwa okulushire emisî yinyu. Ci haguma n’amashumi, ammuhà oku mwagafuma n’emisî mwagagalamwo.Ebiryo by’enterekêro. Okurhayinjibana n’abagashâniza abazimu
14Co cirhumire, yâgi bîra bâni, muyâke okugashâniza enshushano z’abazimu.15Nammushambâza kulya omuntu ashambâla n’abantu bagwêrhe obukengêre mwene muyumve oku ndesire.16Akabehe k’omugisho rhugisha, ka burhali bushangîre bw’omukò gwa Kristu? Omugati rhubega, ka burhali bushangîre bw’omubiri gwa Kristu?17Kulya kubà omugati guli muguma gwône, ciru rhukaluga, rhuli mubiri muguma gwône, bulya rhweshi rhushangîra ogwo mugati muguma.18Mulole Israhelink’oku ali oku bwôrhere bw’omubiri. Ka abalya ebi barherekêraga erhi barhalungîni n’omulinzi barherekêreragaho?19Kwo kuderha kurhi okwo? Ka kuli kuderha oku enyama barherekîre enshushano ziri kantu? Nîsi ka kuligi kuderha oku enshushano kali kantu?20Nanga! Ci ebi barherekêra, bashetani babirherekêra, ci arhali Nyamuzinda birherekêrwa. Ntanalonza mushangîre n’abashetani.21Murhakanywêra oku kabehe ka Nyakasane, mukanashub’inywêra oku kabehe k’abashetani. Murhankashangîra ecîbo ca Nyakasane, mukanashub’ishangîra ecîbo c’abashetani.22Nkaba ga kutula rhwalonza okutula obwâgalwa bwa Nyakasane? Ka kulusha rhumulushirage misî?Okurhasârhaza
23«Ntâco ntagwêrhi obuyêmêre bw’okujira»; ci arhali byoshi bigwêrhe akamalo. «Ntâco ntagwêrhi obuyêmêre bw’okujira»; ci arhali byoshi biyûbaka.24Ntâye olonzagye obunguke bwâge yêne, ci alonze obw’abandi.25Mulye ngasi byoshi baguza omu cibuye, buzira kudôsa erhi kuyôboha omurhima gwayish’immulya kurhuma.26Bulya igulu libà lya Nyakasane n’ebimubà byoshi.27Erhi omuntu orhali mwemêzi ankakuhamagala okanayêmêra okujà emwâge, onalye ngasi hyoshi akakusholôlera, buzira kudôsa erhi kuyôboha omurhima gwayish’ikulya kurhuma.28Cikwône erhi ankakubwîra, erhi: «Ebi byarherekîrwe abazimu», orhabiryagakwo, erhi olya wakubwîraga orhuma bo n’omurhima gwâge.29Omurhima ndesire, gurhali ogwâwe, ci ogw’owundi. Bulya cici cankarhuma nie ntagengwa narhegekwa n’omurhima gw’owundi muntu?30Erhi nankalya akantu nanavuga Nnâmahanga omunkwa, cici cankacirhuma nagayirwa akantu ndwîrhe navugira omunkwa? Okujira byoshi oku izîno lya Nyakasane n’okuhà abandi olwiganyo lwinjà.31Kuziga kubîre kulya, kubîre kunywa, na ngasi hyoshi mwankajira, byoshi mubijire oku kukuza Nnâmahanga.32Mumanye mwankasârhaza Abayahudi, nîsi erhi Abagereki, nîsi erhi Ekleziya ya Nyamuzinda,33nk’okûla niono ncîsêza okusîmîsa boshi omu ngasi kantu. Ntalonza bunguke bwâni, ci bunguke bwa banji, nti lyo bacunguka.