1 Kemɨtiuyɨ16hch_wb2

1Kakaɨyari tɨratuya kakuniyari kani'atɨarieni Rawiri hakewa 'ixuriki kiyari meta'aitakai. Muwa mekaneitateni hikɨ mawari taiyariyari mekaniuwewieni meta memɨyuxewinikɨ mawariyari Kakaɨyari hɨxie.2'Arike mawari heutipareku, Rawiri Yawé kaniutawawirieni teɨteri 'aixɨa mɨwayurienikɨ3meta 'ixaheritsixi yuxexuime 'ukitsi meta 'ukari paa kaniwaruta'ɨitɨani meta takɨ takari tsuirayari, meta kaxie patsaruyari tsuirayari.4Hikɨ Rawiri hipame rewitsixi Yawé tɨratuya kakuniyari kaniwaruhɨritɨani hetsiena mieme memɨte'uximayakakɨ, pamɨpariyutsi memipitɨakakɨ meta witsimemutiyuanenikɨ Yawé hepaɨtsita, 'Ixaheri kakaɨyarieya.5Memanayexeiyarie mepɨhɨkɨtɨkai: 'Atsahapi mexɨakame pɨhɨkɨtɨkai: Tsakariyaxi, hutarieka mieme pɨhɨkɨtɨkai: manatari mepɨhɨkɨtɨkai Kekiyeri, Tsemiramuti, Kehieri, Matatiyaxi, 'Eriyáwi, Wenahiyaxi, 'Uweri-'Erumi meta Keyeri, mɨkɨ 'arɨpakɨ teyuitɨwamete mepɨhɨkɨtɨkai meta kanaritekɨ. 'Atsahapi tepɨa mutitirirɨka pɨyuitɨwametɨkai.6Mawari wewiwamete Wenahiyaxi meta Kahatsieri matɨa kuxineta meputihɨtsiwakai Yawé tɨratuya kakuniyari hɨxie.

Rawiri nɨawarieya

7Mɨkɨ tukaritsie, matɨari pɨyɨanekai Rawiri kwikari mɨyetɨa 'Atsahapi meta 'iwamama wahetsɨa 'ikɨ nɨawari Yawé hetsiemieme.8«'Aixɨa xekenaitɨkani Yawé hetsiemieme, kemɨtimariwe xekenekuxatani,xekenekuxatani kemɨtiuyuri teɨteri watsata.9Xekeneutikwikani, nɨawari hetsiena mieme.xekenekuxatani mariwemekɨ kemɨtiuyuri.10Xekeneyutemamawieka mɨmariwe mɨpatsie xemexeiyakɨ.xekeneyutemamawieka yurikɨ Yawé xemɨkuwautɨwe.11Yawé hetsɨa xekeneyu'awietani mɨtɨrukaɨyekɨ,yaxeketenahɨaweni yuheyemekɨ.12Xekenaye'eriwani mariwemekɨ kemɨtiuyuri,'inɨari kemɨtiuwewi meta 'aitsika ke'aneneme mɨyetɨa.
13»'Ixaheri nuiwarimama, Yawé ti'uximayatsiriwameKakuwu niwemama, Yawé mɨxe'anayexei:14Yawé takakaɨyari pɨhɨkɨ,naitsarie kwiepa katini'aitani kemɨtiheitserie.15Mɨkɨ yutɨratɨ yuhemekɨ kana'eriwani,xeimiriyari nuiwariyari wahamatɨa yuniuki kaniyetɨani.16'Apɨrahami matɨa tɨratu kemɨtiuwewi,meta 'Itsahaki matɨa kemɨtiuyuhɨritɨa,17Kakuwu yakatiniutahɨawe, 'aitsika kaneyeitɨirieni,'ixaheritsixi wahetsiemieme tɨratu yuheyemekɨ mieme kanayeitɨani:18“'Ekɨ Kanani kwieyari nekamaniyetuiriemɨkɨ,piinitɨarika 'ahetsiemieme mɨhɨkɨtɨni hepaɨ”.19Kepauka 'akuxi temɨkatamɨirekai,tewatari tekanihɨmetɨkaitɨni yakɨ teyupaɨmetɨ mɨkɨ kwieyaritsie,20kepauka hipame kwieyaritetsie xemu'uwakaimeta kepauka hipame te'aitamete wahetsɨa xemu'uwakai,21Kakaɨyari pɨkatiupitɨa waɨriyarika temɨteta'aitɨarienikɨ,te'aitamete kaniwarutatieni 'iya wanaki'erietɨ:22“Neteɨterima nemɨwaranayexei xepɨkawa'uximatɨaka.Neniukamete xepɨkatewakwinitɨaka”.
23»Yunaitɨ teɨteri kwiepa memɨtama Yawé mekenɨawani.Meke'ikuxatani tukari mɨyehane kemɨtiyuwikweitsitɨwa.24Nuiwarite watsata xekenekuxatani witsikemɨ'ane,meta mariwemekɨ kemɨtiyuriene xekenekuxatani yunaime teɨteri watsata.25Yawé matsi kanimariweni,hetsiena pɨtinake witsimɨtikɨhɨawarɨwani,matsi waɨkawa makaxiwatɨ keyuri hipatɨ kakaɨyarixi.26Tixaɨtɨ mepɨkatehɨkɨ teɨteri wakakaɨyarixi,matsi Yawé muyuawi kaniutawewieni,27Xawatɨriya meta kemɨtimariwe hɨxiena kanixuaweni,temawierika kanixuaweni meta tɨrɨkariya tukieya muyepatsieta.
28»Yawé xeketeneyetuiri, yunaitɨ teɨteri,Yawé yaxeketeneutahɨawi witsikemɨ'ane meta kemɨtitɨrɨkaɨye.29Yawé yaxeketeneutahɨawi witsikemɨ'ane mɨmariwekɨ,hɨxiena xekeneu'axɨa 'imikieri xete'epinirietɨ,Yawé xekenayexeiyani tukieya witsimɨ'aneta.30Yunaitɨ teɨteri kwiepa memɨtama meke'eyemakaxeni.Mɨkɨ kwie 'apuyeye, mɨkɨta pɨkakuyuani.31Muyuawi keyutemawieka meta kwie ke'utanaweni.nuiwarite mɨpaɨ meke'utiyuani: “Yawé pɨti'aitame”.
32»Haramara ke'utayuaneni meta yunaitɨ mana memɨteye'uwa.'Ɨtsi keyutemawieka meta tita mana memɨtexɨawe.33Kɨyexi hɨritsie mieme ke'utikwikani temawierikakɨ Yawé hɨxie,mɨkɨ 'ukanamieni kwiepa tita'aitake.
34»'Aixɨa xeketenahɨaweni Yawé mɨkɨ 'aixɨa mɨtiuka'iyarikɨ,meta naki'eriyaya mɨwaɨkawa hawaikɨ pɨkaheu'axe.35Mɨpaɨ xeketenahɨaweni: “Ketaneutawikweitsitɨa, Kakaɨyari, tawikweitsitɨwame pemɨhɨkɨ.Ketaneukuxeɨri ketaneɨxɨna Kakaɨyari memɨka'ayexeiya watsata temɨka'u'uwanikɨ,temɨmatsinɨawanikɨ kepemɨtimariwe,temɨyutemamawiekakɨ tematsinɨawatɨ”.36Yawé 'aixɨa kerahɨawarɨwani, 'Ixaheri Kakaɨyarieya,yuheyemekɨ meta kaheu'akamekɨ».Hikɨ yunaitɨ teɨteri mɨpaɨ mekaniutiyuani: «Mɨpaɨ ketiɨyɨni», hikɨ 'aixɨa mekaniutiyuani Yawé hepaɨtsita.
37Rawiri Yawé tɨratuya kakuniyari 'Atsahapi kaniuhɨritɨani meta 'iwamama, memɨte'uximayakakɨ hetsiena mieme, yamemɨteyuriekakɨ kemɨreuyewekai tukarikɨ.38'Uweri-'Erumi kitenie tihɨwemekɨ kaniutahɨawe meta 'iwamama haika tewiyari heimana 'atahaika memɨyupaɨmekai, metatsiere 'Uweri-'Erumi Kerutuni nu'aya meta Kutsa.39Mawari wewiwame Tsaruki meta 'iwamama mawari wewiwamete kaniwaruhɨritɨani Yawé tukieya Kawahuni hɨriyaritsie paitɨ makawekai,40mana mawari taiyariyari yamemɨtehewewiekakɨ Yawé hetsiemieme, ximeri meta taikai Yawé 'aitsikaya kemainekai 'ixaheritsixi memɨyetuiriyarie.41Hipameta kaniwaranayexeiya, Hemani meta Kerutuni meta hipame, Yawé hetsiemieme memutikwikanikɨ: «Naki'eriyaya hawaikɨ pɨkaheu'axe».42Hemani meta Kerutuni matɨa kuxinetate mepexeiyakai, tepɨa mutitiraurɨka meta hipame, Kakaɨyari nɨawarieya hamatɨa memɨte'ukayuitɨwanikɨ. Kerutuni niwemama kitenie mepɨtehɨwemetetɨkai.43Hikɨ 'arike yunaitɨ mekaneutayeixɨani yukie, meta Rawiri yutɨɨriyama wahetsɨa kanakunuani meta Kakaɨyari kaniutawawirieni 'aixɨa muwayurienikɨ niwemama.
expand_more
Search